لسه بتحبنى ؟

هو انت لسة بتحبنى ؟
دا انا نفسى كرهتنى !
ما انت عارفنى
اكثر من نفسى

كل ما قلبى بيحلم حلم مبيكملش
و بقول انى هابطل احلم ومبقدرش
بمشى فى سكة وجعها مبيرحمش
واحلف انى هارجع و مبرجعش

تايهة ولا عرفالى صديق
كل يومين بمشيلى طريق
قاسية ولا بيهمنى حد
حبى لنفسى فاق الحد

و لسة برضه بتحبنى ؟
دا انا نفسى كرهتنى !

جواب لصاحبى

صديقى
قبل اى حاجة
و اهم من كل حاجة
وحشتنى
امتى بقى هتيجى ؟
هنا مكانك الحقيقى

سبت بلادك
رحت بعيد
نسيت احلامك
عشت وحيد
ايه كان صابك
ما كنت شديد

فات اسبوعين
حاسسهم سنتين
كرسيك الفاضى
و ذكريات الماضى
محصرنى بقالهم بومين

و لما شد عليا الحنين
دموعى سبقتنى
و على الأنين
رجليا خدتنى
لكل مكان
بيفكرنى باللى كان
ايام زمان

شارع بيتكم كان قلقان
خايف منه تكون زعلان
انا طمنته
و عليك حننته
قالى دا هاجر !
قلت مسافر
قالى دا ناكر !
قلت معاند
و مسيره يعاود

عارف شفت مين امبارح
على كورنيش البحر المالح
لا قول انت
انا مش هاقول
ايوا مظبوط
عم حسين بياع الفول
فوله لساه مش معقول
قولى صحيح
موحشكش الفول ؟

عيد ميلاد يس
ابن صاحبك أمين
كان يوم الأثنين
كمل سنتين
و عنيه لساة حلوين
فاكر يس ؟

البت اختك
زعلانة منك
ليلاتى بتحلم بيك
قولى بجد
ليه بينى و بينك سد
من امتى الهجر
بقى عندك حل ؟
و بقيت انا عندك
زيى زى اى حد !

مصر بتنده يوماتى عليك
نفسها تحضن تانى ايديك
لما بتسألنى عليك
بقولها سامع
بقولها راجع

مصر بعتالك معايا رسالة
بتقولك محتجالك
جرب تحكى
هى سمعالك
و درعاتها فتحالك

انا مش بضغط عليك
بس بجد كلنا اشتقنا ليك

قبل ما اوجهك
واجه نفسك
عملك ايه سفرك ؟
قدر يداوى جرحك؟
بلاش معاندة
و كثر مناهدة

اوعدنى
لما جروحك توجع

وعنيك تحن و تدمع
ندا بلادك تسمع
لم هدومك و ارجع

ارجع
بلدك هنا
ارجع
مكانك هنا
ارجع
اهلك هنا
ارجع
انت هنا
مش هناك
ارجع

امضاء
صاحبك
اللى لساة بيحلم
انك تسمع
و ترجع
ارجع

اخرج و اقفل الباب وراك

لما خبطت على بابى
و قلبك قال بهواكى
سمعك قلبى و سلملك
فتح الباب وامنلك
ظلمت انا روحى معاك
فاخرج و اقفل الباب وراك

ازاى قادر تكون قاسى
و مستهون بأحساسى
دا انا كنت يوم منك
و احلامى كانت عنك
جرحنى و قتلنى هواك
فاخرج و اقفل الباب وراك

شفتك نجم فى السما عالى
حبيتك و دفعتنى الثمن غالى
نسيتنى و عشت حلمك
محيتنى و كتبت اسمك
تعبت من دور الملاك
فاخرج و اقفل البابا وراك

يا ريتنى ما سمعت و لا سلمت
لا كنت فتحت و لا امنت
لما على بابى خبطت
و لا عمرى كنت قلت

اخرج و اقفل الباب وراك