اخرج و اقفل الباب وراك

لما خبطت على بابى
و قلبك قال بهواكى
سمعك قلبى و سلملك
فتح الباب وامنلك
ظلمت انا روحى معاك
فاخرج و اقفل الباب وراك

ازاى قادر تكون قاسى
و مستهون بأحساسى
دا انا كنت يوم منك
و احلامى كانت عنك
جرحنى و قتلنى هواك
فاخرج و اقفل الباب وراك

شفتك نجم فى السما عالى
حبيتك و دفعتنى الثمن غالى
نسيتنى و عشت حلمك
محيتنى و كتبت اسمك
تعبت من دور الملاك
فاخرج و اقفل البابا وراك

يا ريتنى ما سمعت و لا سلمت
لا كنت فتحت و لا امنت
لما على بابى خبطت
و لا عمرى كنت قلت

اخرج و اقفل الباب وراك

البت ففيان

اهداء خاص الى حبيبة قلبى ففيان

البت ففيان
ام ضحكة جنان
جاية عنيها لون الرمان

كبدى يا بنتى
مالك احكى
و اياكى تبكى

فضفضى و اشكى
ليكى الحق و لا عليكى
اوعى تخافى قلبى معاكى

خفى حمولك
انسى همومك
طول ما ايديا فى حضن ايديكى

احضنينى و اهدى
دا حزن معدى
هايمشى مسافة ما نخد و ندى

ايوا تمام
اضحكى تانى
ضحكه جنان

و املى حياتى
حنان و امان
زى زمان

دارى جوا عنيكى الدمعة

صعب اشوفك قدامى ضايعة
عارف لسة جراحك واجعة
قبل ما تمشى
اسمعى منى
عارفك تايهة

دارى جوا عنيكى الدمعة
عارف انك منتش راجعة
قبل ما تقسى
ارحمى ضعفى
قولى مسامحة

بعد ما قلبى خان العهد
مش طالب منك وعد
نفسى اقولك
لسة بحبك
رغم الصد

شوقى ليكى فاق الحد
و لسة بينى و بينك سد
نفسى اضمك
لسة بحسك
رغم البعد

واضح انى جيت متأخر
بس دا نصيب متقدر
راضى بقدرى
اصل خيانتى
مهياش ذنبك

فدارى جوا عنيكى الدمعة
عيشى حياتك
و امشى طريقك
و لو فى يوم ندهت عليكى
اعملى نفسك منتش سامعه

هما كلمتين

هما كلمتين و قلتهم
لا فوقهم و لا تحتهم
زى ما تكون مستنيهم
رحت ولا شوفتك بعديهم
طب مش كنت تقولى
انك ملهوف على بعدى



هما كلمتين و قلتهم
لا فوقهم و لا تحتهم
من قد ايه و انا حيشاهم
و بقول لعقلى منيش قيلاهم
ادينى ريحتك من الحيرة
و بقولك فضها سيرة

قلبك تايه و دا عيبه
كلمة توديه و كلمة تجيبه
دا حبنا طول عمرة مفكك
فمش مستاهلة انك تتلكك
على كلمتين قلتهم
لا فوقهم و لا تحتهم

مات الحلم يا ناصر

مش هاقولك فينك
او محتاجينك

لا الزمان زمانك
و لا المكان مكانك

قلبى وجعنى عليك
يا ريتك اصلا ما جيت
بطلت ابكى عليك
يا ريتنى انساك يا ريت

منستاهلش اسمك
فى تاريخنا
خنا وعدك
طبعنا و سالمنا
حطوا ايدهم فى ايدنا
بيعنا و ساومنا
قايضنا حتى على ضميرنا

مات الحلم يا ناصر
مش هنقاتل
و لا هناضل
معدش شئ فاضل
لا قومية
و لا عربية
الجمهورية
بقت ملكية
و القضية
بقت منسية

بعنا فلسطين و الجولان
بقينا جيل خايب و جبان
لف و دار بينا الزمان
و استكتروا علينا الهجان
مش جديد عليهم الإمتهان
قالوا دا عميل و خان

و المعترض اكيد مجنون
و يا حسرة على القانون
خلاص هيعدلوه
الطوارئ هيلغوه
و يجيبوا الإرهاب اخوه
و الى عليهم اديهم عملوه

المواطنون لا يسمعون
دول يا نائمون
يا محبطون
و النابغون
يغسلون الصحون


على صوت خطبك
انا شبيت
و بأفكارك
عشت و حبيت
فسامحنى
إذا كنت قسيت

انا مش ضحية

متبصليش البصة ديا
انا مش ضحية
انا اللى بإيدى بعت القضية
و كنت راضية و مرضية
انا خنت قلبى و قلت فاضى
انا بعت عمرى و قلت عادى
فمتبصليش البصة ديا
انا مش ضحية
انا اللى اخترت اكون فريسة لحزن قاسى
و عملت زى النعام و فى الرمل دفنت راسى
فمتبصليش البصة ديا
انا مش ضحية
انا كنت اضعف من الضعف ذاته
و خرست ندا قلبى و اهاته
انا قتلت قلبى و بكيت مماته
قال يعنى كانت مهمة اوى عندى حياتة
فمتبصليش البصة ديا
و لا تبكيش عيونك على الصبية
هى اللى فتحت بيبان الأسية
و قالت الحكاية ملهاش بقية
فمتبصليش البصة ديا
انا مش ضحية

هذيان

هاصرخ
و اقول انى خايفة
و ان سألونى ليه
هاهمس و اقول مش عارفة

هاضحك
و اقول انى فى سعادة عايشة
و ان واجهونى بدموع عنية
هانكر و اقول دى دموع فرحة

هاكدب
و اقول انى قلبى فاضى
و ان قرولى كتباتى
هابتسم و اقول دا خيال عادى

هابعد
و اقول انى حنيت لوحدتى
و ان فرضوا روحهم على دنيتى
هاجرى و اغير سكتى

هابكى
و اقول انى حزينة بعيد عن السامعين
و ان جم يبكوا بعيون كدابين
هامسح دموعهم و اقول اهدوا دى طرفة عين


همثل
و اقول انى راضية اكون لعبه فى ايديهم
و ان تمثيلى مدخلش عليهم
هاستهبل و اقول جننونى مفيش حاجة بترضيهم

هاعقل
و اقول انى بطلت جنان
و ان فكرونى بتصرفات زمان
هاتقمص الدور و اقول يا ناس محتاجة شوية حنان

هاقسى
و اقول انى اعتقلت قلبى بتهمة الخيانة
و ان نصحونى احن و انسى الإهانة
هاصرخ و اقول حرام عليكم دا انا برده انسانة